منتديات جناب الهضب

جدارة ، موقع نور ، برنامج نور ، جداره ، النتائج ،حافز ، قياس ،نتائج الطلاب ، نتائج الطالبات ، نتائج القدرات ، اسماء المرشحات ، دفعات جدارة ، أخر أخبار جدارة،نتائج القدرات ، نتائج التحصيلي ، جناب الهضب التعليمي ، موهبة ،كفايات

اعلانات قوقل متجاوبة2

صحيفة حزم

صحيفة حزم المالك ورئيس التحرير مرعي بن علي القحطاني http://www.alhzim.com/index.php

    البارحه والعين . . مدري علامها

    شاطر

    jnabcom
    مستشار منتديات جناب الهضب
    مستشار منتديات جناب الهضب

    عدد المساهمات : 3525

    البارحه والعين . . مدري علامها

    مُساهمة من طرف jnabcom في الثلاثاء 17 فبراير 2015 - 7:00

    البارحه والعين . .  مدري علامها
    سجت بي الافكار  وابعد منامها
    يافكري اللي ســجّ والناس نايمه
    في ليلتن غاب القمر عن ظلامها
    ظلما ولا العربان تسمع حسيسها
    مـاغــير ذيبــن ليلته .  ماينــامها
    فكّرت والتفكير .. ماحلّ حاجتي
    كثرت هواجيسي وزاد ازدحامها
    شبيت نيـــراني  وصلحّـت دلّتي
    فنجالها يجلى  الكــداير وآلامها
    سر ياقلم  دام الجزيـلات عادتك
    وانظم وانا بامرك حـسب انتظامها
    ياجاهلـن دنيـاك جــوّد نصيحتي
    تفضـّل الوضحى وجوّد خطامها
    لاشفت عوجـا الناس دنّق وخلّها
    واستر عليها ما انت ناقص آثامها
    لاتنقــل . . السـلاّه يذيّـك شوكها
    لافايـــده منها . . ولا من زمامها
    واصبر لو ان هموم بقعا تحيط بك
    والروح لاتكــثر عليها . . . ملامها
    لاتعلّـم العربان . . تفرح بك العدا
    بكره تصيبك . من رماية سهامها
    خلّك محيطن . . غبّته مادريبها
    اكتم . ترى حق السـرآير كتامها
    وان ضعت شاور من تفيدك مشورته
    ولاتستـدّل بنآس . . يغـوي كلامها
    واسفه سـفيه القــوم حذرا تجادله
    حتى لوانك ما انت خـايف خصامها
    والزلّه اللي دون مقصـد تعـدّها
    حذرا الحقايد فيك يكـثر زحامها
    لو كل زلّة جاهلن . . نلـتفت لها
    امدا هل الـزلّات  جـــرّت ندامها
    لكّن والرجّال . . . عقــله يعلّــمه
    يسايـس الدنيا ويفهـم نظـامها
    والدّقه ان دقتّــك . . وكّد محـلّها
    معروف والدّقه  تـــدرّس غـلامها
    وحذراك من نّم العرب لاتـنمّـها
    حتى لو ان النـاس ضرّك نمامها
    وخاو الرفيق اللي تعزّك مخوّته
    حي الرجال اللي بعيـدن مرامها
    لاتخـاوي اللي للطمـانه ينـزّلك
    فـي هويةٍ  مادونها الاّ عسامها
    وابعد عن اللي ذكرها ماينـاسبك
    خوفي تقيّـمك العرب من مقامها
    وناسن ليا جات الشدايد حزام لك
    خـلّك ليا جات الشدايد  حزامها
    ولاتزعـل الضيفـان لاجتك عانيه
    خلّك بشوش الوجه لاابدت سلامها
    حقّن عليك الضيف تدسم شواربه
    باللي شحـمها ترتكي له عظامها
    واليا اعزمتك الناس والناس خلّصت
    حذراك لاتاكـل بقــــايا طعامها
    واليا نطحت الفـال والناس قالطه
    اقلط مـدام الناس تاكــل لقـامها
    ولاتزعل الجيران دامك جويرهم
    دام النبي وجّب علـينا احترامها
    واصل الرحم حذراك تقطع وصيلته
    لاخير في ناسن ماتاصل رحامها
    واختار بنت اللي كريمه ســلايله
    بالدين والمنسـب  تعلّـق وسامها
    الذربه اللي كـل واجب . . تقـنّنه
    وان بان همـك زاد فيك اهتمامها
    ولاتخطب اللي دينها ماتحـافظه
    ولاتخطب الرمه . . يعـلّك رمامها
    ولاتخطب اللي ساسها مايشّرفك
    نصيبها  عند الخــوال وعمامها
    ونفسك على الهفوات لاتنحني بها
    يافـارس اركبها  وجـوّد لجـامها
    من كانت قصور المذلّه مساكنه
    خلّه ترى قصوره قريبـن هدامها
    وكلّن يجي مدحـه بحسبة فعايله
    وكل العرب  لابد تاخــذ قسامها
    احـدن قسامه من قوايم نويقـته
    واحدن قسامه من جوانب سنامها
    من لاعمــل للمرجله في شبابته
    اليا كــــبر ماحصّل الاّ عدامها
    المرجله ماكّل رجلن يحـــوزها
    تبغى الرجال اللي نشيطن قوامها
    وجه الرجل مثـل المرايه صفـاوته
    دار المـرايه  وانتبه من حطامها
    هذي النصيحه حظّ منهو عمل بها
    نصيحةٍ  ماهوب صعبن فهــــامها
    ياعود جوّدها وعلّم بها الصبي
    قـل قالها (محمد ) وفكّك بهامها
    واختامها صلاة ربي على النبي
    دام القصيده مابقا الا ختامها

    محمد سيف الحربي

    jnabcom
    مستشار منتديات جناب الهضب
    مستشار منتديات جناب الهضب

    عدد المساهمات : 3525

    رد: البارحه والعين . . مدري علامها

    مُساهمة من طرف jnabcom في الثلاثاء 17 فبراير 2015 - 7:01

    07:00:52

      الوقت/التاريخ الآن هو الخميس 8 ديسمبر 2016 - 10:57